రజనీకాంత్, కొమ్మినేని బెస్ట్ యాంకర్స్ అట!

వారమంతా హడావుడిగా ఉండే హైదరాబాద్ ఒక్కసారిగా అలిసిసొలసి పెద్ద వేప చెట్టు కింద సేదతీరినట్లు అయిపోతుంది...ఆదివారం పూట. రోడ్లు కాస్త ఖాళీగా కనిపిస్తాయి. జనం రిలాక్స్ గా కనిపిస్తారు. ఇళ్ళ నుంచి బిర్యానీ వాసన వస్తుంటుంది. అందుకే ఆదివారం ఉదయం వాకింగ్ మిగిలిన రోజులుకన్నా భిన్నమైనది.

ఈ ఆదివారం ఉదయం...వాకింగ్ చేసాక...దగ్గరిలోని టేబుల్ టెన్నిస్ హాల్లో మా వాడు ఎలా ఆడుతున్నాడో అని చూసేందుకు వెళ్ళాను. గతంలో రోజూ అందులోకి వెళ్ళేవాడిని కానీ....ఈ మధ్య వివిధ కారణాల వల్ల ఆ ఆట మీద మనసు కాస్త విరిగిపోయింది. వీడిని భారత్ తరఫున ఆడేవాడిగా చేయాలని ఎన్నో ఆశలు ఉండేవి. ఈ వ్యవస్థను, ఇందులో ఓవర్ ఏజ్ గొడవను, రాజకీయాలను, దేశభక్తి లేని అమాంబాపతు జనాలను చూశాక...మనం ఆకాశానికి నిచ్చెనలు వేస్తున్నామేమో అని అనిపించింది. ఇది వేరే విషయం.


సరే..ఆ హాల్లోకి వెళ్ళాక ఇద్దరు ఐ.టీ.ప్రొఫెషనల్స్ ఆట మధ్యలో విశ్రాంతి సమయంలో మాట్లాడుకుంటూ కనిపించారు. చర్చ చాలా సీరియస్ గా సాగుతోంది. దేశంలో స్పోర్ట్స్ చంకనాకి పోవడానికి (అంటే..డెవలప్ కాకపోవడానికి. క్షమించాలి.) కారణాలు ఏమిటన్న దానిపై అర్నబ్ గోస్వామి 'టైమ్స్ నౌ' ఛానల్ లో జరిపిన చర్చ గురించి ముందు మాట్లాడుకున్నారు. ఆ తర్వాత చర్చ తెలుగు ఛానెల్స్ లో యాంకర్స్ మీదికి మళ్ళింది. 

అందులో ఒక పెద్ద మనిషి...TV-9 స్టార్ యాంకర్ రజనీకాంత్ (పక్క ఫోటో) కు వందకు వంద మార్కులు వేశారు. "అతను చాలా స్రూడ్. ప్రశ్నలు చాలా తెలివిగా ఉంటాయి. భయం లేకుండా ప్రశ్నలు అడుగుతాడు," అని ఆయన చెప్పారు. తాను చూసిన రజనీ ప్రోగ్రామ్స్ ను ఆయన వివరిస్తూ ఆ యాంకర్ గొప్పతనాన్ని వేనోళ్ళ కీర్తించారాయన. ఇక అటు పక్క ఉన్న ఐ.టీ.మనిషి విశ్లేషణ మొదలయ్యింది. 

"సార్...మీరు ఎన్నైనా చెప్పండి. కొమ్మినేని (N-TV చీఫ్ ఎడిటర్) శ్రీనివాస రావు (ఈ పక్క ఫోటో) ది బెస్ట్ యాంకర్. తడుముకోకుండా భలే మాట్లాడతాడాయన," అని ఆయన కితాబు నిచ్చారు. ఆయన జోక్ గా అంటున్నారేమో అనుకున్నా. కాని ఆయన సీరియస్ గా చెప్పిన మాట అది. ఆ విశ్లేషణ, సంభాషణ అలా చాలా సేపు సాగాయి. కొమ్మినేని గారు టీ.వీ.లో పత్రికా భాష మాట్లాడతారని, నవ్వకూడని చోట నవ్వుతారని నేను అనుకుంటాను. ఆయనకూ విశేషంగా అభిమానులు ఉన్నారు. ఆయన చర్చకు ఎంచుకునే ప్యానల్ పకడ్బందీగా ఉంటుందని మిత్రులు అంటారు.

నామటుకు నాకు డైనమిక్ యాంకర్ గా అనిపించేది TV-9 CEO రవి ప్రకాష్. అతను కళ్ళతో, నవ్వుతో, స్పష్టమైన భాషతో ఆకట్టుకుంటాడు. ఆ ఛానల్ ఎదుగుదలకు అతని విగ్రహ పుష్టి కూడా ఒక కారణం అని చెప్పవచ్చు. 

రవి ప్రకాష్ తర్వాత చెప్పుకోవాల్సింది HM-TV లో కనిపించే బాలకృష్ణ అనే కుర్రవాడు. అతను సూపర్బ్ యాంకర్. ఆ స్వచ్ఛత, సమయోచిత మాటలు, నగుమోము బాగా నచ్చుతాయి మాకు. అతను కష్టపడి, పట్టుపట్టి మరీ యాంకర్ అయ్యాడట. ఒకసారి లైవ్ లో అతనితో కే.సీ.ఆర్. నోరు జారి మాట్లాడితే....నాకు ఒళ్ళు మండింది. ఈ లోపే ఆ అబ్బాయి...జాగ్రత్తగా మాట్లాడి...తమ ఛానల్ ఏ పక్షమూ వహించదని భలే కట్ చేశాడు. 

మొదట్లో బాగుండే స్వప్న గారు నానాటికీ దిగదుడుపులా అయిపోతున్నారు. కారణాలు ఏమిటో గానీ...ఆమె మొహం బాగా దెబ్బతిన్నట్లు కనిపిస్తున్నది. మాటలు కూడా ముద్ద ముద్దగా వస్తున్నాయని నాకు అనిపిస్తున్నది. మూడు రోజుల కిందట ఆమె 'సాక్షి' ఛానల్ లో నిలబడి వార్తలు చదువుతుంటే...ఒకటే తడబాటు, అస్పష్టత. ప్రగతి అనే యాంకర్ గారు చదివితే కూడా బాగుండేది. 


సౌజన్య అనే చలాకీ యాంకర్ అప్పట్లో ఒక మెరుపు మెరిసారు. 'ఈ-టీ.వీ' తో అరంగేట్రం చేసిన ఆమె.. తర్వాత N-TV లో చేరారు. తర్వాత i-news లోకి దూకారు. అక్కడ కొన్ని రోజులు చేసి...Mahaa news లో చేరారు. తెలుగు టీ.వీ.కి దొరికిన మంచి ఆణిముత్యం ఈమె అనడంలో సందేహం లేదు. i-news లో ఉన్న రోజా గారు కూడా మంచి న్యూస్ రీడర్ కానీ...పిచ్చి డ్రస్సులు, ఓవర్ మేకప్, ఎబ్బెట్టు హెయిర్ స్టైల్ తో చూడడానికి ఎలానో అయిపోతున్నారామె. "ఆమె (రోజా) మా స్కూల్ (న్యూ ఇరా) ప్రిన్సిపాల్ గా ఉండే వారు," అని సెలవలకు ఖమ్మం నుంచి వచ్చిన మా అన్నయ్య కూతురు చెప్పింది.
N-TV లో ఉన్న శ్వేతా రెడ్డి, హిమబిందు కూడా నాట్ బ్యాడ్.

గోరంత విషయాన్ని కొండత చేసి పూటల కొద్దీ నడపడంలో దిట్ట సత్యనారాయణ మూర్తి. ABN-ఆంధ్రజ్యోతి స్టార్ యాంకర్, ప్రజెంటర్ అయిన మూర్తి మాదిరిగానే TV-5 యాంకర్ వెంకట క్రిష్ణ కూడా వండివార్చడంలో చతురుడు. బహు భార్యత్వం ఆరోపణలు, యాసిడ్ దాడితో చాలా కోల్పోయిన కరీం కు కూడా మంచి ఫాన్స్ ఉన్నారు. తనకు తెలియని విషయాన్ని అయినా సరే తెలివిగా కూలంకషంగా చర్చించడంలో అతను దిట్ట. 

కందుల రమేష్ గారు మంచి యాంకర్. ప్రస్తుతమున్న యాంకర్స్, ప్రజెంటర్స్ లో అందరికన్నా విషయ పరిజ్ఞానం ఉన్న మనిషి ఆయన. TV-5 నుంచి వచ్చాక యాజమాన్య బాధ్యతలలో పడి తెరమీద కనిపించడం లేదు కందుల. తెరవెనుక ఎవ్వారాలు ఎక్కువైతే...తెర మీద పెర్ఫారం చేయడం ఎవరికైనా కష్టమే కదా!