ఫిదేల్ కు టీ టీ లో మరొక జాతీయ స్థాయి టైటిల్

ఏవేవో ఆరోపణలు ఎదుర్కొంటూ  "టైమ్స్ ఆఫ్ ఇండియా"లో ఐదు నెలలుగా పని చేయకుండా జీతం తీసుకుంటున్న ఒక సీనియర్ జర్నలిస్టు గురించి, "ది హిందూ" లో ప్రమోషన్ల వ్యవహారం గురించి, కొన్ని చానళ్ళ విలేకరులపై ప్రభుత్వం తెలంగాణా ముద్ర వేయడం గురించి, "ది సండే ఇండియన్"ఉద్యోగులకు జీతాలు ఇవ్వకుండా ప్రపంచానికి మాత్రం ప్రవచనాలు వల్లిస్తున్న ఆరిందం చౌదరి గురించి, హెచ్ ఎం టీ వీ నుంచి కోటి ఆశలతో వీ సిక్స్ చానెల్ కు వెళ్లి అక్కడి బాసు మూలంగా ఏడాదిలోనే ఒక చేదు 'అంకం' ముగించుకుని మళ్ళీ పాత చానెల్ కు వెళ్ళిన నా మిత్రుడి గురించి, అవినీతి జర్నలిస్టుల గురించి...సమాచారం పుష్కలంగా ఉన్నా...రాయబుద్ధి కాక రాయలేదు. ఈ మీడియా గురించి, భారత రాజకీయాల గురించి, కుక్క తోక గురించి రాయడం ఒక్కటే అని స్పష్టం కావడం ఒక్కటే ఈ నైరాస్యానికి కారణం కాకపోయినా....ఎందుకో మనసు పోలేదు. 

ఈ రోజు మాత్రం...వ్యక్తిగతమైన ఒక విషయాన్ని రాయడానికి బ్లాగు ఓపెన్ చేసాను...చాలా రోజుల తర్వాత. మా పుత్రుడు ఫిదేల్ గత ఆరు రోజులుగా హిమాచల్ ప్రదేశ్ లోని సోలన్ అనే చోట వున్నాడు. సీ బీ ఎస్ ఈ జాతీయ స్థాయి పోటీలలో అండర్ 14 వ్యక్తిగత విభాగంలో పాల్గొనేందుకు వెళ్ళాడు. మొన్న క్వార్టర్ ఫైనల్లో సుమిత్ గోగోయ్ అనే ఒక అస్సాం క్రీడాకారుడిని ఓడించిన ఫిదేల్ ఈ రోజు ఉదయం డిల్లీ కి చెందిన యుగమ్ గులాటి మీద సెమీ ఫైనల్స్ లో గెలిచి ఫైనల్స్ కు చేరుకున్నాడు. నేను ప్లాన్ చేసినట్లు మనవాడు ముందుకు వెళ్ళుతున్నాడని,  గోల్డ్ మెడల్ వస్తుందని అనుకున్నాము నేను, హేమ. కానీ ఫైనల్స్ లో బెంగాల్ కు చెందిన శివాజీ రాయ్ అనే ఆటగాడి చేతిలో ఈ మధ్యాన్నం ఓడిపోయాడు. పన్నెండు సంవత్సరాల పిల్లవాడు అండర్ 14 విభాగంలో ఆ లెవెల్ కు పోవడమే గొప్ప. పైగా సిల్వర్ మెడల్ తెచ్చాడు. మాకు చాలా ఆనందం అనిపించింది. అది పంచుకోవడానికే ఈ పోస్టు. మరేదో రాస్తానని పోస్టు చివరి దాకా చదివి...'సొంత డబ్బా'తో చంపేస్తున్నాడు...' అని అనుకున్న వారికి సారీ. ఈ ఫోటోలో ఉన్నది మా వాడే.