N-TV లో మరొక వెర్రి...వెకిలి లైవ్ ప్రోగ్రాం

నరేంద్రనాథ్ చౌదరి గారి N-TV లో ఒక అరగంట కిందట 'నలుపే శాపమా...' అన్న శీర్షికన ఒక లైవ్ ప్రోగ్రాం ప్రసారమయ్యింది. ఇది చూశాక....'ఈ ఛానల్ లో ఇంతమంది మంచి సీనియర్ జర్నలిస్టులు ఉన్నారు....వీళ్ళ బుర్ర ఖరాబ్ అయ్యిందా?' అని అనిపించింది.

ఎవడో వెంకట రమణ అనే వాడు ఈ రోజు మానవ హక్కుల సంఘం దగ్గరకు వెళ్లి..."నా భార్య కాపురానికి రావడం లేదు...నేను నల్లగా ఉన్నానని నాతో కాపురం చేయడం లేదు"...అని ఫిర్యాదు చేశాడు. అక్కడ N-TV రిపోర్టర్ కు మన వెంకట రమణ దొరికాడు. దొరికాడో...మన రాజన్న వాడిని పట్టుకోమని రిపోర్టర్ ను పురమాయిన్చాడో తెలియదు. ఇంకేముంది...అతన్ని, అతని అమ్మను, ఒక న్యాయవాదిని స్టూడియోలో కూచోబెట్టి...వరప్రసాద్ అనే ఒక యాంకర్ తో కార్యక్రమం నడిపారు.

మొగుడు పెళ్ళాం పంచాయితీ...విచిత్ర మలుపులు తిరిగింది. ఇందులో మొదటి ఆఫ్ లో వెంకట రమణ...తన భార్య మీద ఆరోపణలు చేశాడు. ఆ ఆడ లాయర్...పురుషులకు అనుకూలంగా అస్సలు చట్టాలు లేవని బాధపడ్డారు. ఇంతలో...'భార్యా బాధితుల సంఘం' నేత సీ.వీ.ఎల్.ఎన్.నరసింహ రావు గారు ఫోన్ లైన్లో వచ్చారు. 'ఇప్పుడు మీరు చెప్పండి...వెంకట రమణ ఇక్కడ ఉన్నాడు," అని యాంకర్ గారు అడిగారు. సగం ఇంగ్లిష్, సగం తెలుగు యాంకర్ ఈయన. 

ఇక నరసింహా రావు గారు (లోక్ సత్తా ఈయనకే కదా ఎన్నికల్లో పోటీ చేసే అవకాశం ఇచ్చింది) ...కాసేపు ప్రసంగించి ఒక్క సైడు కథనం విని...'ఈ మీడియా లేకపోతే...ఇలాంటి గొంతులు మూగ పోయ్యేవి," అని ఒక నిట్టూర్పు విడిచారు. ఇంతలో...వెంకట రమణ భార్య ప్రమీల ఫోన్ లైన్ లోకి వచ్చారు.

'చూడు హేమా..ఇప్పుడు కథ పూర్తిగా కొత్త మలుపు తిరుగుతుంది,' అని నేను అంటూ ఉన్నానో లేదో...ప్రమీల (అసెంబ్లీ లో ఉద్యోగి అట) వెంకట రమణ పై ఆరోపణలు గుప్పించింది. నలుపు అసలొక అంశమే కాదని...అతనికి డబ్బు, బంగారం పిచ్చి అని చెప్పింది. తనను తిట్టాడని, కొట్టాడని తెలిపింది. ఆమెకు అండగా ఆమె పైఉద్యోగి నరసమ్మ గారు అనుకుంటా...కూడా ఫోన్ లైన్ లో వచ్చారు. ఇద్దరూ కలిసి వెంకట రమణ ప్రమీల ను ఎలా వేధించేది...వివరించారు. ఈ నరసమ్మ గారు ప్రమీల తనకు 'కూతురు కన్నా...చాలా ఎక్కువ' అని ఎమోషనల్ గా మాట్లాడారు. 

తాను పక్కన పడుకుంటే...ప్రమీల ఎలా చీదరించుకునేది....వెంకట రమణ వివరించగా...తనను 'ఎవరితో తిరిగావే ఇప్పటిదాకా' అని అడిగేవాడని ప్రమీల సభకు తెలియజేసింది. యాంకర్ గారు....న్యాయ మూర్తి పాత్ర పోషించారు...మధ్యమధ్యలో ఎస్...కరెక్ట్ అంటూ.

చివరాఖరికి...యాంకర్ గారు...కార్యక్రమం ముగుస్తున్నామని చెబుతూ ఉండగానే...'ఒక్క క్షణం సార్...మా బస్తీ లో వాళ్ళు ఆయన గురించి చెబుతారు," అని ప్రమీల మరొక అమ్మకు ఫోన్ పాస్ చేసింది. 
"నిజమే సార్...ఆయన పద్దతి బాగా లేదు," అంటూనే ఆమెను ఆయన ఏ ఏ బూతు మాటలు అనేది అని వినిపించింది. నేను ఆ మాటలు కూడా పోస్టులో  రాస్తానంటే..."ఛీ అవి రాస్తావా...బుద్ధిలేకుండా," అని హేమ వారించింది.
ఛీ....ఇదేమి ఖర్మండీ మనకు..ఈ ఛానెల్స్ వల్ల. ఇక లాభం లేదు...మనం కూడా ఖతారో, దుబాయో వెళ్ళాలి లేదా ఈ N-TV బ్యాచ్ ను ఎర్రగడ్డ కో, ఎర్రుపాలానికో పంపాలి.