అణకువ, సౌమ్యం చిరునామా....అంజనా సౌమ్యా నే విజేత

ప్రతిదానికీ ఎగిరెగిరిపడడం, మనలో ప్రతిభ గోరంత అయితే...కొండంత ఫోజు కొట్టడం, ఏదో చిన్నపాటిది సాధించగానే ఆస్కార్ కొట్టినట్లు ఓవర్ యాక్షన్ చేయడం...మనకు అలవాటు. ఇలాంటివి ఏమీ లేకుండా...ఎంతో అణకువతో ఉండే ఒక మనిషిని నేను Maa టీ.వీ.వారి పుణ్యాన చూస్తున్నాను. ఈ రాత్రి  జరిగిన 'సూపర్ సింగర్స్--4' గ్రాండ్ ఫినాలే లో ఆమెకు మూడు లక్షల రూపాయల బహుమతి వస్తే చూసి చాలా ఆనందం వేసింది. 

ఆ అమ్మాయి పేరు అంజనా సౌమ్య. ఆమె వివరాలు పూర్తిగా తెలియవు కానీ...ఆమె పాటలో ఏదో మాధుర్యం ఉంది. ఏ పాటనైనా ఆలవోకగా అద్భుతంగా పాడుతుంటే మైమరచి పోవడం శ్రోతల వంతు. అన్నింటికీ మించి...ఆమె అణుకువ చూస్తే ముచ్చటేస్తుంది. ఈ అణకువ ఆచరిస్తే వచ్చేదేనా? జన్మతః రావలసిందా? ఏమో!?


కోటి, మను, సుద్దాల, సునీత వంటి వాళ్ళు ప్రశంసిస్తున్నా....అంజన సౌమ్యంగా నవ్వేదే తప్ప ఎగిరెగిరి పడలేదు. ఇదేదో మనమంతా నేర్చుకోవాల్సిన మంచి విషయం. గెలవగానే...హడావుడి లేకుండా...ఇతర పోటీదార్ల (participants) దగ్గరకు వెళ్లి ఆమె వినమ్రంగా కరచాలనం చేసింది. తల్లిదండ్రుల సహాయసహకారాలను ఆహూతులకు తెలిపింది. 

రెండో బహుమతి పొందిన రవి కూడా తక్కువ తినలేదు. అతనికి ఒక రెండు లక్షలు వచ్చాయి. జానపదాలతో ఉర్రూతలూగించిన రవి...చివరకు మాట్లాడుతూ--"మా అమ్మను ఇక్కడ సత్కరించడం...ఈ బహుమతి కన్నా ఎక్కువ. ఏదో దేశాన్ని జయించినంత ఆనందంగా ఉంది," అన్నాడు.  
ఈ కార్యక్రమంలో ఒక చిచ్చర పిడుగు షణ్ముఖ ప్రియ కూడా అద్భుతంగా పాడింది. తన గాత్రంతో ఫైనల్స్ దాకా వచ్చి...ఒక పాతిక వేలు కొట్టేసింది.
ఈ కార్యక్రమాన్ని విజయవంతంగా నిర్వహించి అంజన, రవి లాంటి 'బెటర్ దాన్ ది బెస్ట్' ను ప్రపంచానికి అందించిన ఈ ఛానల్ కు అభినందనలు. 
అంజన వివరాలు, ఆమె పాటల గురించి తెలిసిన వాళ్ళు తమ తమ అభిప్రాయాలు రాస్తే...అవన్నీ కలిపి ఒక మంచి పోస్ట్ చేయాలని ఉంది. అణకువగా ఉండడం ఎలానో కూడా తెలిపి పుణ్యం కట్టుకోండి. 
Photo courtesy: tubeoli.com