మీడియా బాసుల స్వరూప స్వభావాలు- పార్ట్ I

Mahaa-TV లో పనిచేసే ఒక యువ యాంకర్....ఉద్యోగంలో రోజు వారీగా తనకు ఎదురయ్యే సమస్యలు, తనకు నచ్చని యాజమాన్య పద్ధతులు, వృత్తిలో లొసుగులు ఏ మాత్రం దాచుకోకుండా...తన బ్లాగ్ లో రాసుకోవడం వివాదాస్పదం అయ్యింది. బాసుల మీద పోస్టులు తొలగించమని యాజమాన్యం కోరినా...భావప్రకటన స్వేచ్ఛకు ఆమె విలువ ఇచ్చి ఆ పని చేయలేదు. దాని బదులు యాజమాన్యం కోరిన వెంటనే 'హాప్పీ'గా జాబ్ వదిలేసి వేరే ఉద్యోగ ప్రయత్నాలలో పడింది. ఆమె స్వేచ్ఛా భావనకు, ఆత్మస్థైర్యానికి హాట్స్ ఆఫ్ అనే వారూ లేకపోలేదు.

ఈ నేపథ్యంలో...మీడియాలో బాసుల స్వరూప స్వభావాలు రీడర్స్ కు తెలియజేయడం చాలా ముఖ్యం. ఒక కార్పోరేట్ సంస్థ లో బాస్ వేరు, మీడియా లో బాస్ వేరు. కార్పోరేట్ బాసు ఒక క్వాలిఫికేషన్, ప్రాజెక్టులలో పూర్వానుభవం వంటి కొన్ని ప్రాతిపదికల (criteria) ద్వారా ఎంపిక అవుతాడు. మీడియా బాసుల విద్యార్హతలు చూస్తే...ఇతర రంగాల వారు ముక్కున వేలేసుకుంటారు. చాలా మందికి కనీస విద్యార్హతలు లేవు. డిగ్రీ మాత్రమే చదివి, ఏదో సంస్థ ఇచ్చే స్వల్ప కాలిక శిక్షణ తర్వాత...తన విజ్ఞాన పరిధి విస్తరించుకోకుండా...రాజకీయాలు చేస్తూ బాసులుగా బతికేస్తున్న మహనీయులకు ఇక్కడ కొదవే లేదు. పైవారిని బోల్తా కొట్టించో, బూట్లు నాకో పబ్బం గడుపుకునే....మానిప్యులేటర్స్ చాలా మంది బాసుల అవతారం ఎత్తి నిజమైన జర్నలిస్టులను చంపుకు తింటున్నారు. సృజనాత్మకతను ధ్వంసం చేస్తున్నారు.

"చదువు రాకపోయినా...జర్నలిజాన్ని బ్రహ్మాండంగా నిర్వహించిన వారు లేరా? దీనికి విద్యార్హతలు దేనికి?," అని ఈ బాసులు మొండిగా వాదిస్తారు. అందుకు కొన్ని నికార్సైన ఇదాహరణలు చెబుతారు. ఈ ధోరణి వల్ల కనిపించని చాలా నష్టం జరుగుతున్నదని కొందరు, లేదు..లేదు...ఆల్ ఈజ్ వెల్ అని కొందరు వాదిస్తారు. అది వేరే వివాదం. 

సహజంగా...Boss are asses  అన్న అభిప్రాయం కింది ఉద్యోగులు చాలా మంది లో ఉండడం కద్దు. మీడియా లో boss are brainless asses అనేది నానుడి. ఇది ఎందుకు వచ్చింది అంటే....బాసుల నియామకం కులాల వారీగా, ప్రాంతాల వారీగా జరుగుతున్నది ముందు నుంచీ. సమాజానికి నిత్యం హితం చెప్పే ఎడిటర్లు తమ సన్నిహితులను, అడుగులకు మడుగుగులొత్తే వారిని, నోటి దురుసుతో ఇతరులతో పనులు చేయించే వారిని వివిధ శాఖల హెడ్స్ గా నియమించారు. 

'ఈనాడు' లో ఆరంభంలో ప్రొఫెషనలిజం ప్రాతిపదికగా బాసుల నియామకాలు  జరిగినా....తర్వాత కులం-ప్రాంతం ఆధారంగా ఎంపిక జరిగిందన్న ఆరోపణలు ఉన్నాయి. నాకు బాగా గుర్తు...'ఈనాడు' జనరల్ డెస్క్ లో యాజమాన్య సామాజిక వర్గానికి చెందిన ఒకడు ఇంచార్జ్ గా ఉండే వాడు. తనకు ఇంగ్లిష్ సరిగా రాదు, అయినా...వార్తా సంస్థల కాపీలు తర్జుమా చేసే సెక్షన్ కు ఇంచార్జ్ చేశారు. అది ఎంత ఘోరం? కొందరు సబ్-ఎడిటర్లు....తనను ఏడిపించడానికి....ఇంగ్లిష్ సందేహాలను అందరూ వినేట్లు పెద్దగా అడిగే వారు. "పెద్దగ అడగమాకయ్యా బాబు. ఇట్రా. నీకు తోచింది రాయి. తర్వాత చూద్దాం," అని ఆయన అనే వాడు. ఆ తర్వాత వాడిని ఏదో విషయంలో డిమోట్ చేయడం....మళ్ళీ ఈ మధ్య ప్రమోట్ చేయడం చేసారట. బుర్ర తక్కువ బాసులు అన్న దానికి ఇదొక క్లాసికల్ కేస్. 

ఒక్క తెలుగు మాత్రమే తెలిసి...తాను రాసిన ఒక్క నవలతో పెద్ద రచయితనని తనకు తాను భావించే మరొక నరరూప త్రాస్టుడు ఒకడు కూడా ఇదే డెస్క్ లో చాలా రోజులు బాసు పాత్ర పోషించాడు. ఇప్పుడు వాడు 'సూర్య'లో వెలుగుతున్నాడు. వీరంతా...బాసులుగా ముమ్మాటికీ అనర్హులు. చాలా మంది జర్నలిస్టుల ఉద్యోగాలు పోవడానికి, వందల మంది మానసిక వేదనకు వీరు కారణం.

మరొక ఉదాహరణ: 'ఈనాడు' సండే మాగజీన్, వసుంధర పేజ్ సెక్షన్ ను ఒక మహానుభావుడికి  అప్పగించారు అప్పట్లో. ఆయన ఇతరులతో పనులు చేయించే వాడు...స్వతహాగా ఆ వర్క్ డీల్ చేసే సత్తా ఉన్న జర్నలిస్టు కాదు కాబట్టి. ఆయన పేరిట రామోజీ రావు ఏవో భూములు కొన్నారు కాబట్టి...ఆయన్ను ఆ సెక్షన్ ఇన్-ఛార్జ్ గా చేసారని అనుకునే వారు. సారు ఒక మహిళామణితో తన చాంబర్లో కాలక్షేపం చేసేవాడు. 

ఇప్పుడు జనరల్ డెస్క్ చూస్తున్న వ్యక్తిది మరొక కథ. సబ్బింగ్, ఎడిటింగ్ వంటి డెస్కు పనులకన్నా ....రిపోర్టింగ్, ఫీచరింగ్ అద్భుతంగా చేయగలిగే జర్నలిస్టు ఆయన. ఇయినా...కొన్ని ఈక్వేషన్స్ ప్రాతిపదికన అతన్ని అక్కడ పెట్టారు. ఫలితం? అందరికీ విదితమే. ఇలా చెబుతూ పోతే...పేపర్స్/ ఛానెల్స్ లో బాసులను కేవలం ప్రతిభ ప్రాతిపదికన ఎంచుకున్నారు అని చెప్పుకునే కేసులు బహు స్వల్పం.

ఇక్కడ ఇంకో ముఖ్య విషయం వుంది. ప్రొఫెషనల్స్ ఇతర మహిళలతో, సాటి ఉద్యోగులతో డీల్ చేసే దానికి, అమాంబాపతు బాస్ లు డీల్ చేసే దానికి...చాలా తేడా  వుంటుంది. ఇప్పుడు మీడియా బాసులు గా ఉండి extra-marital relations 'ఎంజాయ్' చేస్తున్న వారు, కింది ఉద్యోగులను వేయించుకు తినేవారంతా....సరైన శిక్షణ లేకుండా...ఎవడి ఆశీస్సులతోనో పైకి ఎదిగిన వారేకావడం విశేషం. మీ సంస్థలో...హెరాస్మెంట్ తో కింది ఉద్యోగుల కంటి మీద కునుకు లేకుండా చేస్తూ, ఒకరిద్దరు కీప్ లను ఆఫీసులో తయారు చేసుకుని కులుకుతున్న బాసుల ప్రొఫైల్ చూడండి. వారి గ్రాఫ్ లో చాలా లోపం వుంటుంది. నా ఈ అబ్సర్వేషన్ తప్పయితే...నాకు రాయండి. 

అయితే...ఈ బాసులు ఎలా బండి నడుపుతారు? అనే అంశం ఆశ్చర్యకరమైనది. ఈ బుర్ర తక్కువ బాసులు...రెండు పనులు చేస్తారు. ఒకటి) కింది ఉద్యోగులలో బాగా పనిచేసే వారిని ఎంచుకుని...వారు లాయల్ గా ఉంటే...వారిని ప్రోత్సహిస్తూ....పని చేయించుకుంటారు. రెండు) తనకు నచ్చని వారిని...ఎంత ప్రతిభావంతులైనా...తొక్కి పారేస్తారు. వారిని హింసించి చంపుతారు. సెలవులివ్వరు, యాజమాన్యానికి తప్పుడు నివేదికలు ఇచ్చి తప్పుదోవ పట్టించి కెరీర్ నాశనం చేస్తారు. ఇలా ఎందరో...నిర్భాగులు మీడియాలో సజీవ సమాధి అయ్యారు. 

మీడియా బాసుకు ఒక సౌలభ్యం వుంది. నచ్చని వాడి వర్క్ ను తేలిగ్గా తిరస్కరించవచ్చు. నచ్చిన వాడు రాసింది...'అబ్బో అద్భుతం..." అని ఆకాశానికి ఎత్తవచ్చు, ఆ రాతలకు గానూ ఒక ప్రమోషన్ ఇప్పించవచ్చు. ఎందుకంటే...ఇది సృజనాత్మకతో ముడిపడి వున్న అంశం. ఆ ధోరణి, వ్యవహారం ఎలా ఉంటుందో మరొక పోస్ట్ లో చూద్దాం.