తెలుగు మీడియా----సంకుల సమరం

ఉన్నది ఉన్నట్టు నిర్మొహమాటంగా మాట్లాడుకుంటే, భారతీయ సమాజంలో పోషించే పాత్రనే తెలుగు మీడియాలో కూడా కులం పోషిస్తున్నది. తమ కులానికి చెందిన వారిని దగ్గరకు తీయడం, కులాలవారీగా గ్రూపులు కట్టడం, కుల రాజకీయాలు చేయడం మీడియాలో విపరీతమైపోయింది. సామాజిక కార్యకర్తలుగా ఉండాల్సిన జర్నలిస్టులు చాలా వరకు సొంత కులం వాళ్లతో కలివిడిగా ఉండటం, ఇతర కులస్థులను పనికిరానివారిగా చిత్రీకరించడం పెరిగిపోయింది. 

"ఈనాడు" గ్రూపులో కమ్మ కులస్థులకు ప్రాముఖ్యం ఉండటం స్పష్టంగా కనిపిస్తుంది. బుర్రలో గుజ్జుతో నిమిత్తం లేకుండానే యూనిట్ల మేనేజర్లుగా కమ్మవారినే నియమిస్తారని నిరూపించే ఒక డాక్యుమెంటు గతంలో నా దగ్గరకు వచ్చింది. అది చూస్తే...ఒక పద్ధతి ప్రకారం కులాన్ని పోషించే కార్యక్రమం అవగతమయింది. నిజం చెప్పాలంటే...అంతా ఆంధ్రా కమ్మలే.

పెద్దగా ప్రావీణ్యంలేనివారికి కూడా ఆ కులానికి చెందితే పెద్ద పదవులే కట్టబెడతారన్న ఆరోపణను నేను ఖండించలేను. ఎందుకంటే...అలాంటి వారిని నేను హైదరాబాద్ ఆఫీసులో దగ్గరి నుంచి చూశాను. పదవి వచ్చాక మీడియాలో మెయిన్ టైన్ చేయడం పెద్ద కష్టం కాదు. 

"సీహెచ్" అని ఇంటిపేరున్న ఒక బ్రాహ్మణ జర్నలిస్టు...తనింటిపేరు చెరుకూరి (రామోజీరావుగారి ఇంటిపేరు) అని చెప్పుకుని ఆ పేపర్లో చాలా రోజులు సకల మర్యాదలు పొందాడని చెబుతారు. "మీరు ఎన్.రామ్ కు చుట్టాలంట గదా...అందుకె మీకు 'ది హిందూ'లో ఉజ్జోగం వచ్చిందంట గదా..." అని ముందు 'ఈనాడు'లో పనిచేసి ఆ తర్వాత 'ది హిందూ'లో చేరి పనిచేస్తున్న ఒక చలాకీ పిల్ల అడగడం నాకు గుర్తుకువస్తున్నది. మా ఇంటి దగ్గర తొమ్మిదేళ్ల పిల్ల ఒకతి...టేబుల్ టెన్నిస్ ఆడటానికి వచ్చి...."అంకుల్...మీదేమి క్యాస్టు?" అని అమాయకంగా అడిగింది. తురకోళ్లం అని చెబితే నమ్మలేదు. "రాం నారాయణ చౌదరి...పెద్దగా ఉందని రాము అంటారు..." అని చెబితే..."నేనప్పుడే అనుకున్నా..." అని ఎంతో ఆనందంగా చెప్పిందీ మధ్యన. 

రామ్ సింగ్ అని పేరు ఉంటే ఎంతబాగుండని నాకు ఎప్పుడూ అనిపిస్తుంది. నా పుత్రుడి పేరు...ఫిదెల్ రఫీక్ స్నేహిత్ అని పెట్టడం, కులం పేరు చెప్పకుండా పెంచడం గర్వంగా అనిపిస్తుంది...కానీ ఈ కులాల పెంట వల్ల భావితరం ఎంత ఇబ్బంది పడుతుందో...అని భయమేస్తుంది. 

నా ప్రియ మిత్రుడు రఫీ (సన్ నేమ్ లో మధ్య పేరు వీడిదే) గత వారం ఫోన్ చేశాడు. "అరే...అన్నా...మనం  కులానికి అతీతంగా ఫ్రెండ్ షిప్ చేస్తున్నాం...ఏ ఆఫీసు చూసినా కులాల కంపేరా...నాయనా...నువ్వు ఎలా బతుకుతున్నావ్...." అని అడిగాడు. వాడు, నేను, రమేష్ డిగ్రీలో ఒక కంచం, ఒక మంచం టైపుగా బతికాం. హ్యూమనిజం తప్ప మాకింకేమీ తెలియదు. ఒక ఇరవై ఏళ్ల కిందటితో పోలిస్తే సమాజంలో కులాల వారీ డివిజన్ స్పష్టంగా కనిపిస్తూ ప్రమాదకర స్థితికి చేరింది. పాపం...మా రఫీకి మతంతో అవస్థ వచ్చి పడింది. నా దృష్టిలో మా వాడంత సెక్యులర్ వాది లేడు. అయినా...వాడికి రీసెర్చ్ లో గైడ్ దొరకడం లేదట. బాధేసింది. 

ఇప్పుడు ఒక కమ్మ యజమాని ఛానెల్ లో పనిచేస్తున్న వివాదాస్పద జర్నలిస్టు ...తన కులం పేరు పొరపాట్న  అయినా చెప్పడు. తాను క్షురకుడిననీ...ఎవరైనా తన ముందు తల వంచాల్సిందే అని వెకిలి నవ్వు నవ్వుతూ చెబుతాడు. ఏదిఏమైనా కులం పేరు చెప్పుకుని చాలా మంది కమ్మగా బతికేస్తున్నారు...నిస్సిగ్గుగా ఈ మీడియాలో.

మనం మనం బరంపురం అని అంటకాగలేని ఏ కులస్థులైనా మీడియాలో అవస్థలు పడతారనేది అక్షర సత్యం.

అలాగే సాక్షి పేపర్, ఛానల్ పెట్టగానే రెడ్డి కులస్థులకు రెక్కలు వచ్చాయి. ఏ పేపర్లో ఉన్న రెడ్డి జర్నలిస్టులు అయినా సాక్షి ఆఫీసువైపు చూడడం ఆరంభించారు. యజమాని కులానికి చెందినవారికి ఆ మీడియా హౌజులో ప్రాముఖ్యత పెరగడం ఈ మధ్యన విపరీతమైంది. బీసీ లు ఎలాగోలా నెట్టుకొస్తున్నారు గానీ ఈ క్రమంలో ముస్లిం, ఎస్సీ, ఎస్టీ లు ముందుకు దూసుకుపోలేకపోతున్నారు. 

ఈ నేపథ్యంలో...మీడియాలో పెరిగిపోతున్న కమ్మ ప్రాబల్యాన్ని నిరూపించే ఒక మెయిల్ నాకు వచ్చింది. ఇందులో అన్నీ నిజాలే అని చెప్పలేం. అది ఇక్కడ ఇస్తున్నాను. ముసుగులో గుద్దులాట ఎందుకు? మీ మీ సంస్థల్లో కులం ప్రాతిపదికన రాజకీయాలు చేసే వారి జాబితాలు పంపితే వాటిని పరిశీలించి ప్రచురిస్తాం.