లాభాల బాటలో లోక్ సభ టీ వీ

స్వాతంత్ర్య దినోత్సవం రోజున ఇది నిజంగా శుభవార్తే. నష్టాలు వస్తున్నాయని మొత్తుకుంటూ వివిధ టీ వీ చానెళ్లు నానా విధ పిల్లిమొగ్గలు వేస్తూ, సినిమా క్లిప్పింగుల మీద, స్త్రీ లను అసభ్యంగా చూపించడం మీద బతుకుతుండగా లోక్ సభ టీ  వీ సీరియస్ సమాచారం తో లాభాల బాటలో పయనిస్తున్నది. 2012-13 మొదటి క్వార్టర్ లో వ్యాపార ప్రకటనల అమ్మకంలో ఈ చానెల్ పదిహేను రెట్లు ఎదుగుదలను కనబరిచినట్లు సమాచారం. ఈ ఏడాది ఇరవై కోట్ల రూపాయలు ఆర్జించాలని ఈ చానెల్ లక్ష్యంగా పెట్టుకున్నట్లు 'ది  హోట్' పేర్కొంది. మొదటి మూడు మాసాలలో ఈ చానెల్ వీక్షకుల సంఖ్య మూడు వందల రెట్లు పెరిగినట్లు తెలిపింది. 

2006 నుంచి ఈ చానెల్ హిందీ, ఇంగ్లిష్ భాషలలో కార్యక్రమాలు ప్రసారం చేస్తున్నది. ఇది ప్రజల సొమ్ముతో నడుస్తున్న ఛానల్. లోక్ సభ సమావేశాలు లేని సమయంలో విద్యా, సంస్కృతిక సంబంధ కార్యక్రమాలు ప్రసారం చేస్తున్నది. ఇందులో చర్చలు బాగుంటాయన్న పేరు వున్నది. లోక్ సభ సమావేశాల లైవ్ ను వివిధ భాషల చానెల్స్ వారు లోక్ సభ చానెల్ నుంచి స్వీకరిస్తుంటారు.

నిజమైన భారతీయులు చేయాల్సిన పని ఏమిటంటే...బీచులు, బ్లడ్డు, బొడ్డు మీద బతికే చానెల్స్ ను విదేశీ వస్తువులను బహిష్కరించినట్లు బహిష్కరించి ఈ రోజు నుంచి  అందరం లోక్ సభ చానెల్ ను కాసేపైనా చూడాలి. దాని రేటింగ్ బాగా పెంచాలి. జనాలకు ఉపకరించే కార్యక్రమాలను ప్రసారం చేసేలా.... మన బాధ్యతా రహిత చానెల్స్ కు బుద్ధి వచ్చేలా చేయడం దేశభక్తి గల వారి పని. జై హింద్.