కొత్త తెలుగు ఛానళ్ల జాతర...మహా టీవీ లో ఆకలి కేకలు

ఒక పక్క మహా టీవీ వారు ఉద్యోగులకు జీతాలు ఇవ్వడంలేదని ఆరోపణలు వెల్లువెత్తుతుండగా.....తెలుగులో కొత్తగా రాబోయే నాలుగైదు ఛానళ్లకు సంబంధించిన హడావుడి జోరుగా సాగుతోంది. యాజమాన్యాల పట్ల, బాసుగాళ్ల పట్ల, జీతంరాళ్ల పట్ల అసంతృప్తి ఉన్న జర్నలిస్టులు కొందరు వీటిలో ఉద్యోగం దొరికితే బాగని ప్రయత్నాలు ప్రారంభించగా, వీటి నుంచి ఆఫర్లు వచ్చిన జర్నలిస్టులు పోవటమా మూసుకుని ఉన్నచోటనే ఉండటమా అన్న సందేహంతో సతమతమవుతున్నారు. రాబోయే ఛానళ్లు నాలుగు కాలాల పాటు ఉండేవేనా? ఊడ్చుకుపోయేవా? తెలుసుకుని చెప్పమని మిత్రులు నాకు ఫోన్లు చేస్తున్నారు. ముందుగా రాబోతున్న ఛానళ్ల వివరాలు ఇలా ఉన్నాయి.

1) V 6 (Owned by Telangana leader G.Vinod and headed by Mr.Ankam Ravi)
2) Image (Owned by Image Hospitals and headed by Mr.Narasimha Rao)
3) Tulasi (Owned by Tulasi group and headed by Mr.Bhava Narayana)
4) ABC (Owned by Abhaya Gold + one NRI and headed by Mr.Kannababu)

ఇవికాక, మరో సంస్థ ఆధ్వర్యలో niche ఛానల్ కోసం ఏర్పాట్లు జరుగుతున్నాయి. గతంలో హెచ్.ఎం టీవీ ప్రోగ్రాం హెడ్ గా పనిచేసి సుజాత గారు ఛానల్ కు నేతృత్వం వహిస్తున్నారని, అది వైద్యానికి సంబంధించిన ఛానల్ అని సమాచారం.

వీటిలో కాంగ్రెస్ ఎంపీ జీ వినోద్ గారికి సంబంధించిన ఛానల్ (V 6) లో మాత్రం పనులు చురుగ్గా జరుగుతున్నాయని నాకు తెలుసు. అక్కడ నియామకాలు పూర్తయ్యాయి. విజయవాడ కేంద్రంగా ఒక ఛానల్ రాబోతున్నదని, దానికి అంకబాబు అనే సీనియర్ జర్నలిస్టు అంకురార్పణ చేయడానికి శాయశక్తులా కృషి చేస్తున్నారని నేను గత ఫిబ్రవరిలోనే ఒక పోస్టు రాశాను. దానికి అంకబాబు గారు కూడా సమాధానమిచ్చారు. అది ఎట్టకేలకు రూపు దిద్దుకోబోతున్నది.
 

ఇకపోతే...ఈ ఛానళ్లలో చేరవచ్చా? అన్నది అశావహులైన జర్నలిస్టుల ముందున్న కీలక ప్రశ్న. దీనికి సంబంధించి నేను రెండు రోజులుగా పరిశోధన జరిపాను. ‍వ్యక్తులను పట్టుకుని కాకుండా...నేరుగా యాజమాన్యంతో సంప్రదించి జర్నలిస్టులు పెద్ద పదవులకు వెళ్లడంలో తప్పు లేదు. రిస్క్ చేసినప్పుడే నాలుగు డబ్బులు ఎక్కువ వస్తాయి. ముందుగా పెట్టుబడిదారులకు సంబంధించిన వివరాలు, వారి అజెండాలు తెలుసుకోకుండా తొందరపడకండి. ఇక్కడ చెప్పుకోక తప్పని దిక్కుమాలిన విషయం...కులం. దీని గురించి కూడా ఆలోచించుకుని ముందుకు సాగండి. విజయీభవ. ఇదిలా ఉండగా మహా టీవీ జర్నలిస్టులకు జీతాలు అందడంలేదని ఒక మిత్రుడు మెయిల్ పంపాడు. ఆ లేఖ దిగువ ఇస్తున్నాను. యాజమాన్యం వెంటనే ఈ సమస్య పరిష్కరించాలని ఈ బ్లాగ్ అభ్యర్ధిస్తున్నది. 


మహా టీవీ ఉద్యోగి పంపిన మెయిలు
హయ్ రాము గారు
చాలా రోజుల నుండి మీ బ్లాగ్ ని ఫాలో అవుతున్నాను,..అందుకే మీకు ఈ మెయిల్ రాస్తున్నాను..మహాటివి ఉద్యోగుల ఆకలి కేకలు మీ దృష్టికి తీసుకువస్తున్నాను..గత మూడు నెలలుగా మహాటీవి యాజమాన్యం జీతాలు సరిగా ఇవ్వక ఉద్యోగస్తులను ఎన్ని ఇబ్బందులకు గురిచేస్తుందో వారికే తెలియదు..జీతాలు ఇప్పుడు ఇస్తారో చెప్పరు..అందురు సంక్రాంతి పండుగ చే్సుకుంటే మేము మాత్రం టీవిల్లో అరిసెలు జంతికలు చూసి నోరు చప్పరించుకుని కాలం వెళ్ళదీస్తున్నాము..కొన్ని చానల్ సిబ్బంది ఈ వారంలో జనవరి జీతం కూడా తీసుకుంటుంటే మేము మాత్రం డిసెంబర్ నెల జీతం ఇంకా తీసుకోలేదు..కానీ వార్తల విషయంలో మాత్రం అందరి కంటే ముందు ఉండాలి..కానీ జీతాలు మాత్రం మా ఇష్టం వచ్చినప్పుడు ఇస్తాము అనే పాలసీ.. జేబులో వంద ఉంటే ఎక్కడ అయిపోతాయో అని అపొలో దగ్గరకి వెళ్ళి పది రూపాయిలు ఇచ్చి నాలుగు అరటిపండ్లు తిని ఆకలి చంపుకుంటున్నాము..రూం రెంట్ కట్టలేక రాత్రి పూట ఇండ్లకు సరిగా వెళ్ళని ఉద్యోగస్తులు ఎందరో ఇది ఇలా ఉంటే జీతాలు ఇవ్వక పోగా కొత్త చానల్ అదేమి అంటే దానికేమి పెద్ద పెట్టుబడి పెట్టలేదు అంటారు ..అలానే సినిమా పంక్షన్ లి డబ్బులు ఇచ్చి మరీ కొంటున్నారు..మమల్నిమాత్రం పస్తులుంచుతున్నారు..కాబట్టి మా బాధను మీ బ్లాగ్ ద్వారా పంచుతారని ఆశిస్తున్నాను.