...ఓ ఐదేళ్లు క్రికెట్ ను భారత్ లో నిషేధిస్తే సరి...

గత రెండు రోజులుగా పత్రికలు, టెలివిజన్ ఛానల్స్ చూస్తే...ఏదో సునామీ వచ్చి దేశాన్ని ముంచెత్తినట్లు, జరగరాని పరమఘోరమేదో జరిగినట్లు అనిపిస్తున్నది. జాతి యావత్తూ కోల్పోకూడనిదేదో కోల్పోయిన ఫీలింగ్ కలుగుతోంది. కొందరికి నిజంగానే ఆ ఫీలింగ్ ఉంటే....మీడియా వాళ్ల అత్యుత్సాహం వల్ల ఇంకొందరికి ఆ జబ్బు సోకుతున్నది. ఇవ్వాళ దేశం మొత్తం విషాద సాగరంలో మునిగి ఉంది.

క్రీడాభిమానులు ఇదేదో జాతీయ సమస్య అయినట్టు చర్చించుకుంటున్నారు. పరిస్థితిని బాగుచేయడానికి ఏమి చేయాలన్నదానిపై ఎవడికి తోచింది వాడు సలహాగా ఇచ్చి పారేస్తున్నాడు. చిన్న పిల్లల నుంచి తాతయ్యల వరకూ అంతా విశ్లేషణలతో బిజీగా ఉన్నారు. ఆడ స్త్రీలు, మగ పురుషులు, పిల్లాపాపా, గొడ్డూగోదా అంతా ఈ విషాదంతో ఉన్నారు. గుంపులో గోవిందా మాదిరిగా ఈ విషాదంలో పాలుపంచుకోని వాడు అసలు భారతీయుడిగా చెలామణీ అయ్యే పరిస్థితి కనిపించడం లేదు. 

ఛీ...ఛీ...ఇలా జరగడానికి వీల్లేదు...దరిద్రులు దేశం పరువు తీశారు...వాణిజ్య ప్రకటనల పిచ్చిలో పడి చెడ దొబ్బారు...వంటి వ్యాఖ్యలు జోరుగా వినవస్తున్నాయి. ఆస్ట్రేలియాలో భారత క్రికెట్ వీరులు కుదేలై వైట్ వాష్ కు గురికావడం ఇంత చర్చకు కారణం.

దేశాన్ని పతనం చేస్తున్న ఏ అంశాల గురించీ, అవినీతి గురించి అస్సలే పట్టని వారంతా క్రికెట్ దగ్గరకు వచ్చేసరికి పరమ వీర దేశభక్తులై పోతున్నారు. సచిన్ టెండూల్కర్ వందో సెంచరీ కోసం కళ్లు, పళ్లు, ఒళ్లు కాయలుకాచేలా చూసే జనం ఎంతమంది లేరు? నా పీహెచ్ డీ, సచిన్ టెండూల్కర్ ఒకేలా ఉన్నాయి. అవి ఎంతకూ తెగని ముడిపడని వ్యవహారాలు. అసలు క్రికెట్ తోనే ఛస్తుంటే...తగదునమ్మా...అని సినీస్టార్లు వారితో పాటు హీరోయిన్లు ఊపుకుంటూ క్రికెట్ మైదానంలోకి దూకుతున్నారు. వారిని చూడటానికి కూడా వెర్రిజనం ఎగబడుతున్నారు. ఛానళ్ల వారు, ముఖ్యంగా టీవీ నైన్ వాడు, గత కొన్ని రోజులుగా ఈ తెలుగు వారియర్స్ ను ఎత్తడంతోనే కాలక్షేపం చేస్తున్నాడు.

అసలు...ఆటలన్న తర్వాత ఓడిపోరా? అయినా...భారత క్రికెటర్లకు ఓటమి ఇదేమైనా మొదటి సారా? దీని మీద అటు జనం, ఇటు మీడియా గుండెలు బాదుకోవాల్సిన అవసరం ఉందా? ఏమో నామటుకునైతే...ఇదొక వ్యర్ధ వ్యవహారం అనిపిస్తున్నది. దీని బదులు...జనం క్రికెట్ పిచ్చిని వదులుకుని అన్ని ఆటల పట్లా ఆసక్తి కనబరిస్తే బాగుంటుంది. మనం, అంటే క్రీడాభిమానులం, ఎక్కువగా క్రికెట్ కు ప్రాధాన్యమివ్వడం వల్ల...మీడియా కూడా దానికే పెద్దపీట వేస్తున్నది. ఈ క్రికెట్ పిచ్చిలో పడి మిగిలిన ఆటలను ఎవ్వరూ పట్టించుకోవడం లేదు. అందుకే...అన్ని అంతర్జాతీయ పోటీలలో పతకాల పట్టికలలో మనం వెనుకబడి ఉంటున్నాం. 

మన క్రికెటర్లు క్రమం తప్పకుండా దేశాన్ని విషాదసాగరంలో ముంచుతున్నారు. ఆ మాటకొస్తే ఏ క్రికెట్ జట్టూ ఎప్పుడూ విజయాలను నమోదు చేయలేదు. క్రికెట్ జట్టు ఓడిపోతే...ఆస్ట్రేలియా, ఇంగ్లండ్, వెస్టిండీస్ తదితర దేశాల్లో జనం కూడా మనలాగానే కుళ్లి కుళ్లి ఏడిచ్చస్తున్నారా అన్నది పరిశోధించాల్సిన అంశం. ఈ ఏడుపులు పెడబొబ్బలు మాని ఒక ఐదేళ్ల పాటు క్రికెట్ ను నిషేధిస్తే భారత దేశానికి పలు రకాలుగా ఎంతో మేలు జరుగుతుందని నాకు గట్టిగా అనిపిస్తున్నది. ఇంతకన్నా ఉత్తమమైన ఆలోచన వస్తే నాతో పంచుకోండి.