మీడియాలో అత్యంత కీలక పరిణామాలు

'ది హిందూ' రెసిడెంట్ ఎడిటర్ గా మురళీధర్ రెడ్డి 
ప్రముఖ ఆంగ్ల పత్రిక 'ది హిందూ' హైదరాబాద్ రెసిడెంట్ ఎడిటర్ గా సీనియర్ జర్నలిస్టు, దక్షిణాసియా జర్నలిజంలో అగ్రశ్రేణి రిపోర్టర్ బి. మురళీధర్ రెడ్డి ఈ వారం నియమితులయ్యారు. ఆయన విధుల్లో చేరడం, ఉద్యోగులతో కాంటాక్ట్ లోకి వెళ్ళడం కూడా అయ్యింది.  సౌమ్యుడిగా, మృదు స్వభావిగా ఆయనకు పేరుంది. 

శ్రీలంక జాతుల పోరాట పరిణామక్రమాన్ని దగ్గరి నుంచి చూసిన, ఎల్ టీ టీ ఈ-లంక సైన్యం యుద్ధాన్ని ప్రత్యక్షంగా ది హిందూ, ఫ్రంట్ లైన్ పత్రికలకు విస్తృత స్థాయిలో రిపోర్ట్ చేసిన అత్యంత అనుభవజ్ఞుడు మురళీధర్ రెడ్డి గారు. ముందు సుసర్ల నగేష్ కుమార్, ఆయన అర్థంతరంగా పదవి నుంచి వైదొలిగాక బెంగుళూరు నుంచి బదిలీ మీద వచ్చిన కె. శ్రీనివాస రెడ్డి ఇదే పదవిలో పనిచేసారు. శ్రీనివాస రెడ్డి గారు కీలకమైన బాధ్యతల నిర్వహణకు చెన్నై వెళ్ళాల్సివచ్చాక... కొన్ని రోజులు జల్లెడపట్టి మరీ మురళీధర్ రెడ్డి గారిని ఈ పదవిలో నియమించారు. గతంగా ఆయన పాకిస్థాన్ లో, దేశ రాజధానికి కూడా పనిచేసినట్లు 'ది హిందూ' వర్గాలు చెప్పాయి. మురళీధర్ రెడ్డి గారి స్వస్థలం మహబూబ్ నగర్ జిల్లా అట. వుయ్ విష్ హిమ్ ఆల్ ద బెస్ట్. 
(Photo courtesy: www.onlanka.com)

ఏలూరు 'ది హిందూ' రిపోర్టర్ రాజీనామా?
ఇది మునుపటి 'ది హిందూ' కాదన్న వాదన మరీ ఎక్కువగా వినిపిస్తున్నది ఈ మధ్యన. మజిథియ వేతన సంఘం సిఫార్సులను అమలు చేసినట్లేచేసి...ఉద్యోగులను నయానా భయానా కాంట్రాక్ట్ సిస్టంలోకి తీసుకువచ్చి, ప్రతిభతో కూడిన ప్రమోషన్లు ఇస్తున్న ఈ పత్రికలో పనిచేస్తున్న జర్నలిస్టులు అభద్రతాభావంతో ఉన్నారనడంలో సందేహం లేదు. ఏలూరు లో దాదాపు 15 ఏళ్ళుగా 'ది హిందూ' స్పెషల్ కరస్పాండెంట్ గా పనిచేస్తున్న సిన్సియర్ జర్నలిస్టు జి.నాగరాజు రాజీనామా చేసినట్లు విశ్వసనీయ సమాచారం. 
ఆయన 'టైమ్స్ ఆఫ్ ఇండియా' విజయవాడ బ్యూరో చీఫ్ గా వెళుతున్నట్లు చెబుతున్నారు. 'ది హిందూ' వీడి ఒక సీనియర్ జర్నలిస్టు 'టైమ్స్' లో చేరడం ఈ మధ్యకాలంలో ఇదే ప్రథమం. అప్పట్లో 'ది హిందూ' లో పనిచేసిన విక్రం శర్మ ఇప్పుడు 'ది న్యూ ఇండియన్ ఎక్స్ ప్రెస్' లో హైదరాబాద్ బ్యూరో చీఫ్ గా ఉన్నారు. 
"కాంట్రాక్ట్ సిస్టం లోకి మారడం తో జర్నలిస్టులలో బాగా అభద్రతా భావం పెరిగింది. అక్కడా (టైమ్స్) కాంట్రాక్ట్ సిస్టమే అయినా... పదవి, దాంతో పాటు నాలుగు డబ్బులు ఎక్కువ వస్తాయి కాబట్టి... మిత్రుడు నాగరాజు ఆ నిర్ణయం తీసుకుని ఉంటారు," అని 'ది హిందూ' లో సీనియర్ జర్నలిస్టు ఒకరు ఈ బ్లాగు బృందంతో చెప్పారు. 
'ది హిందూ' యాజమాన్యం కోరినా... కాంట్రాక్ట్ పద్ధతిలోకి పోయే పత్రాల మీద సంతకాలు చేయని అతి కొద్ది మంది జర్నలిస్టులలో నాగరాజు గారు ఒకరని సమాచారం. కులం, ప్రాంతం, గాడ్ ఫాదర్లను బట్టి కాకుండా...సొంత ప్రతిభతో ఒక పధ్ధతి ప్రకారం మూడు దశాబ్దాలుగా జర్నలిజానికి సేవలు అందిస్తున్న జర్నలిస్టు నాగరాజు గారు. వారికి అంతా మేలు జరగాలని కోరుకుంటున్నాం. 
'నమస్తే తెలంగాణా' వారి ఇంగ్లిష్ పత్రిక? 
 'నమస్తే తెలంగాణా' యాజమాన్యం అతి త్వరలో 'తెలంగాణా టుడే' పేరిట ఒక ఆంగ్ల పత్రికను తీసుకురాబోతున్నట్లు సమాచారం. డెక్కన్ క్రానికల్ లో రిపోర్టింగ్ లో పనిచేసిన ఒక సీనియర్ జర్నలిస్టు ఆధ్వర్యంలో ఇది రాబోతున్నట్లు తెలిసింది. ప్రస్తుతం 'మెట్రో ఇండియా' పనిచేస్తున్న చోటనే కొత్త పత్రిక ఆపరేషన్స్ ఉంటాయి. 'నమస్తే తెలంగాణా' ఆఫీసు కిందనే ఉన్న మెట్రో ఆఫీసు ను ఇందుకోసం సాధ్యమైనంత త్వరగా ఖాళీ చేయాల్సిందిగా కోరినట్లు చెబుతున్నారు. ఈ మేరకు... అప్పరసు శ్రీనివాస రావు గారి నేతృత్వంలోని 'మెట్రో ఇండియా' ఆఫీసును వేరే చోటికి మార్చే ప్రక్రియకు పత్రిక అధిపతి సీ ఎల్ రాజం శ్రీకారం చుట్టారు. సీనియర్ స్టాఫ్ కోసం ఆయన చేయని ప్రయత్నాలు లేవు. 

ఊళ్ళోకి రాబోతున్న 'హన్స్ ఇండియా' 
ఎడిటర్ నాయర్ గారు వెళ్ళాక, డాక్టర్ కే నాగేశ్వర్ పగ్గాలు స్వీకరించాక 'ది హన్స్ ఇండియా' రూపు రేఖా విలాసాలు గణనీయంగా మారాయి. ముఖ్యంగా లుక్ పూర్తిగా మారి ఇప్పుడు పత్రిక కాస్త సంసార పక్షంగా ఉన్నది. మొదట్లో హన్స్ లో ఉండి... తర్వాత మెట్రో లో చేరి మళ్ళీ ఈ మధ్యన పాత గూటికి చేరిన తాటికొండ భాస్కర్ రావు గారు ఈ లుక్ మార్పులో కీలక పాత్ర పోషించారనడం లో అనుమానం లేదు. 

మరొక పక్కన... నాగేశ్వర్ సార్ ప్లానింగ్, సూపర్బ్ ఎడిటర్ పెన్నా శ్రీధర్, రామూ శర్మ తదితరులు కంటెంట్లో తెస్తున్న  మార్పిడితో ఇది సాధ్యమయినట్లు చెప్పుకోవచ్చు. 
ఈ పత్రికను, దాంతో పాటు హెచ్ ఎం టీవీ కార్యకలాపాలను...వేరే ఖండంలో ఉన్నట్లు అనిపించే ఏ ఎస్ రావు నగర్ నుంచి హైదరాబాద్ సిటీ మధ్యకు తెస్తున్నారు. ఈ ఆఫీసులు ఎల్ బీ స్టేడియం చుట్టుపక్కలకు మారుస్తున్నట్లు అధికారిక సమాచారం.